यतखा बहालय् मंकाः देवा च्याकेगु ज्याझ्वः

सुगत रत्न सिन्दुराकार

२०८२ बैशाख ३० गते

उदाय् समाजं दँयदसँ बुद्ध जयन्तीया लसताय् विश्वय् शान्तिं बास लायमा धैगु कामना याना बुद्ध जयन्तीया दिनय् न्ह्याका वयाच्वंगु सामूहिक दीप प्रज्वलन ( देवा च्याकेगु ) ज्याझ्वः थुगु दँय् ऐ्तिहासिक भाष्कर कीर्ति महाविहार यतखा बहालय् बैशाख २९ गते सोमवाः तःजिक याःगु दु । थुगु ज्याझ्वःयात ताःलाकेत परम्परागत यतखा त्वाःया सिन्दुराकार खलःपाखें व्यवस्थापनया ज्या याःगु खः ।

थुगु सामूहिक देवा च्याकेगु ज्याझ्वः झ्वलय् उदाय् समाजया न्हूगु ज्यासना पुचःयात सिन्दुराकार खलःपाखें हनावना तयाः खादागा क्वखायका हनेगु ज्या नं जूगु खः । सिन्दुराकार खलःया छ्या्रन्जे भाजु सुगत रत्न सिन्दुराकारं न्हयाकादीगु उगु बःचाधंगु सभाय् सिन्दुराकार खलःया नायो सुरेन्द्रकाजी सिन्दुराकारं उपस्थित सकसितं लसकुस न्वचु बियादिसें लसकुस यानादीगु खः । थुगु ज्याझ्वलय् उदाय् समाजया नायो भाजु डा. रुपज्योति कसाःजुं उदया् समाजपाखें बुद्ध जयन्तीया लसताय् न्ह्याका वयाच्वंगु ज्याझ्वःयात कयाः थःगु बःचाधंगु न्वचु नं बियादीगु खः ।

उदाय् समाजय् न्हूगु ज्यासना पुचःया नायो डा. रुपज्योति कसाः छ्याञ्जे रजनी ताम्राकार, दिव्य रत्न स्थापित, रत्न्न कमल कंसाकार, भवानी तुलाधर, सुमित्रा तुलाधर, शोभालक्षी तुलाधर, डा. ज्ञानेन्द्र रत्न तुलाधर, प्रमोद मान सिं बनिया, ज्ञानेन्द्ररत्न तुलाधर, ज्ञानराज सिख्राकार, गौरी शोभा सिन्दुराकार, सविन वीरसिं कसाः व शान्तमुनि ताम्राकार, रत्न मुनि सिख्राकार, उत्पला तुलाधर, अमूल्य राज सिन्दुराकार, अमिता कसाः लगायतपिन्त हनेज्या याःगु खः । वयकःपिन्त सिन्दुराकार खलःया नायो सुरेन्द्र काजी सिन्दुराकारं खादागा न्ययका हनावना तयाः बधाइ बिइगु ज्या यानादीगु खः ।

ज्याझ्वलय् मंचय् समाजया नायो डां रुपज्योति कसाः मयजु विना कसाः, खलःया थाकुली नेम रत्न सिन्दुराकार, खलःया नकिं ताराशोभा सिन्दुराकार, खलःया नायो सुरेन्द्र काजी सिन्दु्राकार आसन ग्रहण याका ज्याझ्वः न्ह्याकेगु याःगु खः । ज्याझ्वलय् उदाय् समाजया दुजः डा. अनुप श्रेष्ठाचार्य, निलकमल सेलालिक, कनक राज शिलाकार विशेष कारण वस उपस्थित जुइ मफूगु खः ।

दीप प्रज्वलनया झ्वलय् उदाय् समाजया नायो डा. रुपज्योति कंसाकार मयजु वीणा कसाः व सिन्दुराकार खलःया थकली नेमरत्न सिन्दुराकार, तारा शोभा सिन्दुराकार सहितपाखेंं यतखा बहाःया तःग्वगु चैत्यय् विराजमान जुया बिज्यापिं पञ्चबुद्ध व बहालय् विराजमान जुया बिज्यापिं द्यःपिन्त पुजा यायगु ज्या नं जूगु खः । पुजाया ज्या क्वचायका उदाय् समाजया नायो डा. रुपज्योति कसाःपाखें देवा च्याका ज्याझ्वःया उलेज्या यानादीगु खः । थुकथं हे थुगु ज्याझ्वलय् थीथी उदाय्तयगु खलः पुचःपाखें हःगु देवा च्याकेगु ज्या नं जूगु खः । थुगु हे ज्याझ्वःया झ्वलय् यतखा बहाः कवः ताम्राकार मिसा पुचःपाखेंं उदाय् समाजया न्हूगु ज्यासना पुचःयात सिन्हः तिकाः क्वखा क्वखायका लसकुस यायगु ज्या नं जूगु खः । थुगु ज्या यतखा बहाः कवःया थाकुलीपाखें यानादीगु खः ।

थुगु सामूहिक देवा च्याकेगु ज्याझ्वलय् उदाय् समाज ज्या ज्यासना पुचः, सल्लाहकार पुचः, सिन्दुराकार खलःया जःपिं, १९ वडाया जनप्रतिनिधिपिं, यतखाया टोलबासीपिं, गण्यमान्यपिं, यतखा बहाः कवःया ताम्राकारपिं, यतखा बहाल सुधार समितिया जःपिं, यतखा बहाःया स्थानीयबासीपिं, उदाय् ब्वतित्वपिं, उदाय्तयगु थीथी खलः पुचःया जःपिं, उदाय् मिसा पुचःया जःपिं, सिन्दुराकार खलःया थःथितिपिं याना करीव स्वसःम्ह स्वया अप्पो उपस्थित दुगु खः । ज्याझ्वःया अन्तय् उपस्थित सकसितं सिन्दुराकार खलःपाखें खीर भोजन याकेगु ज्या नं जूगु खः ।